Vətənpərvərlik haqqında şeirlər

Vətənpərvərlik mövzusunda bir-birindən gözəl və mənalı şeirlər

Vətənin keşiyində Şeiri

Müəllif: Mirvarid Dilbazi

Laylasında anam mənə
Belə demiş dönə-dönə:
“Bir anan mən, biri Vətən.
Yadda saxla bunları sən,
Canın kimi sev Vətəni,
O bəsləmiş, oğul, səni.
Bayrağını möhkəm saxla
Sərhədini tez-tez yoxla.
Atan qızıl komandandır,
Qorxu bilməz bir insandır.
Qəhrəman ol, oğul, sən də
Qoru bizi böyüyəndə”.
Gözəl Vətən, gözəl Vətən,
Xidmətində durmuşam mən.

Vətən şeiri

Müəllif: Abdulla Şaiq.

Sən ey gözəl vətənim,
Yurdum, yuvamsan mənim,
Səndə xoş ömür sürür
Sevilənim, sevənim.

Sənsən yanan çırağım,
Yurdum, yuvam, ocağım,
Havam, suyum, torpağm.
Bağım, tarlam, çəmənim.

Səni duymaz hər yetən,
Eşqin çıxmaz könüldən.
Böyük anam sənsən, sən!
Varlığımsan sən mənim.

Sənindir çırpan ürək,
Səndən doğar hər dilək,
Nə gözəlsən, nə göyçək
Sən, ey ana Vətənim!

Bayraq Şeiri

Müəllif: Bəxtiyar Vahabzadə

Torpağım üstünə kölgələr salan
Mənim varlığımın cilası-bayraq.
Zəfərdən doğulmuş Göytürkdən qalan
Qurdbaşlı bayrağın balası bayraq.

Üçrəngli bayrağın kölgəsində mən
Qaraca torpağı vətən görmüşəm.
Zəfər güllərini dövri-qədimdən
Bayraq işığında bitən görmüşəm.

Bayraq mənliyimdir, bayraq kimliyim,
Bayraq-öz yurduma öz hakimliyim.

Harda əcdadımın ayaq izi var,
Bu zəfər bayrağım orda dikəlsin.
Keçdiyi yerlərdə dağlar, yamaclar
Onun hüzuruna salama gəlsin.

Tarixdən qədimdir, zamandan qoca
Mənim bayrağıma sancılan hilal.
Aləmə nur saçdı tarix boyunca
Məbədlər başına tac olan hilal.

Daim ucalasan! Savaş günündə
Əsgər silahıyla səni tən görüm.
Yalnız zəfər çalmış şəhid önündə
Səni alqış üçün əyilən görüm.

Vətənpərvərlik haqqında atalar sözləri – Oxubil.info

Belə sevdim, mən Vətəni Şeiri

Müəllif: Tahir Ələkbərli

Vətən mənim ürəyimdə
Belə sevdim, mən Vətəni
Əməlimdə, diləyimdə
Belə sevdim, mən Vətəni.

Göy Gölü var, Xəzəri var
Xəbislərin nəzəri var
Vətənimin qədəri var
Belə sevdim, mən Vətəni.

Göz oxşayan guşəsi çox
Dənizi bir, meşəsi çox
Bu dünyanın işvəsi çox
Belə sevdim, məm Vətəni.

Vətən bizim ürəyimiz
O, suyumuz, çörəyimiz
Ölsək belə, gərəyimiz
Belə sevdim, mən Vətəni.

Sevgisi var ürəyimdə
Dadı, duzu çörəyimdə
Ömür boyu gərəyimdə
Belə sevdim, mən Vətəni.

Bu dünyanın düzəni var
Sevəni var, bezəni var
Haqq, ədalət gəzəni var
Belə vevdim, mən Vətəni.

Var öləni, vari təni
Var sökəni, var tikəni
Sevməmək olmaz Vətəni
Belə sevdim, mən Vətəni.

Vətən mənim canımdadır
Damarımda, qanımdadır
Ürəyimdə, ruhumdadır
Belə sevdim, mənvətəni.

Vətən bölünməsin Şeiri

Müəllif: Alməmməd İsgəndərli.

Gərək vətən bölünməsin
Hissə-hissə, parça-parça.
Gərək vətən satılmasın,
Qoyulmasın o hərraca.

Hər qarışı vətən olsun,
Hər qayası vətən olsun,
Hər kəsəyi, hər bir daşı
Ər oğluna vətən olsun.

Bəzən vətən qərib üçün
Bircə ovuc torpaq olur.
O torpağa son anında
Vətən deyib, baş da qoyur.

Çoxdan düşüb indi dəbə;
Hey ölçülür faiz ilə
Vətən dediyimiz torpaq.
Necə asan gəlir dilə…

Od tutuban yanar indi
Qəbirləri ərənlərin.
Az görürəm vəfasını
“Vətən, vətən” deyənlərin.

Var-dövlətə baş qarışıb,
Yox millətin başqa dərdi.
Gecə-gündüz məqsədi bu:
Rüşvət aldı-rüşvət verdi.

Sən kömək ol, ulu Tanrı,
Qaytar mənə şöhrətimi.
Nə olar, sən qurtarginən,
Bu bəladan millətimi.

Bu vətənə sahib duran,
Ər qeyrətli oğul gərək!
Elə oğul, qüdrətiylə
Millətinə olsun dirək.

Harayına qoy hay versin
Milyonlarla vətən oğlu.
Arzusudur hər bir kəsin
Qeyrət yolu, şərəf yolu.

Ordum varsa, yurdum var şeiri

Müəllif: Zəlimxan Yaqub

Mənə ordu gərəkdir, xəstəyə dərman kimi,
Mənə ordu gərəkdir, nəfəs kimi, can kimi.
Mənə ordu gərəkdir, sarsılmaz cahan kimi.
Ordum varsa, yurdum var,
Ordum yoxsa, yurdum yox!

Düşmənin yuvasını əlimlə pozmalıyam.
Səngəri dırnağımla, dişimlə qazmalıyam.
Tarixi qələmlə yox, qanımla yazmalıyam,
Ordum varsa, yurdum var,
Ordum yoxsa, yurdum yox!

Gözlər od, əllər silah, canlar sipər olmalı,
Kirpiyimiz sıxılmış yurda çəpər olmalı,
Damarda qan coşmalı, canda təpər olmalı,
Ordum varsa, yurdum var,
Ordum yoxsa, yurdum yox!

Bizə od vuranları yandırıb-yaxan gərək,
Torpağı gözümüz tək qoruyub baxan gərək,
Qəzəb dolu tüfəngəm, çaxmağı çaxan gərək,
Ordum varsa, yurdum var,
Ordum yoxsa, yurdum yox!

Torpağa sahib olub yer üstə yerləşməsək,
Bir canda, bir ürəkdə, bir ruhda birləşməsək,
Millətin taleyini dürüst fikirləşməsək,
Özgələrdən bizlərə dırnaq qədər yardım yox.
Ordum varsa, yurdum var,
Ordum yoxsa, yurdum yox!

İnamsız bir qartalın qanadları gərilməz,
Döyüşsüz azadlığın meyvələri dərilməz,
Şəhidsiz bir millətin vətən ruhu dirilməz,
Oğullar ola-ola, necə deyim mərdim yox.
Ordum varsa, yurdum var,
Ordum yoxsa, yurdum yox!

Nə Tanrıdan əl üzüb,nə haqdan küsmək gərək,
Qan içən yağılarla hüsabı kəsmək gərək,
Vətənin hər daşının üstündə əsmək gərək,
Bu gün desəm gec olar,bu an tələsmək gərək,
Bu gün mənim həyatda bundan böyük dərdim yox,
Ordum varsa, yurdum var,
Ordum yoxsa, yurdum yox!

Torpaq Şeiri

Müəllif: Musa Yaqub

Torpaq müqəddəsdir,
Torpaq müqəddəs,
Gərək yadımızdan çıxmasın bu dərs
O, ürək kimidir – satıla bilməz,
Vətəndi,
atadı,
anadı torpaq.

Odur ilk mayası yoxun, varın da,
Soyumaz nəfəsi qışın qarında.
Yerdən ulduzlara uçanların da
Ümidi torpaqdır, qanadı torpaq.

Gərək tər tökəsən hər qarışına,
O da ruzusunu tökə başına.
Quru kəsəyinə,
çopur daşına
Tum səpən deyər ki, canadı torpaq.

İndi ki, xamı da,
yorğunu da var,
O da bir canlıdır bizdən haqq umar.
Bitirər sünbülü iki şah damar:
Bir adı zəhmətdir, bir adı torpaq.

Vətənpərvərlik haqqında şeirlər

Bənzər şeirlər:

• Vətənə aid şeirlər 2023, Vetene aid seirler toplusu
• 27 Sentyabr Anım Gününə aid şeirlər, 27 Sentyabr şeirləri
• Şəhidlərə aid şeirlər

Azərbaycan yaşayır şeiri

Müəllif: Rafiq Yusifoğlu.

Hərəmiz bu Vətənin,
Parçası, zərrəsiyik.
Yağılara yurdumun,
Parçası, zərrəsi yük.

Bu vətənin yolunda,
Birləşsin əllərimiz.
Sevinsin dağlarımız,
Sevinsin çöllərimiz.

Necə ki, ruhumuz var,
Necə ki, dilimiz var.
Azərbaycan yaşayır,
Yurdumuz-elimiz var.

Nə zaman ki, birləşib,
Hissim, ruhum, bədənim.
Dünyanın özü boyda,
Bir dünyadır Vətənim.

Vətən Marşı Şeiri

Müəllif: Bəxtiyar Vahabzadə.

Ey Vətən oğlu, düşün, bil ki, sənindir bu Vətən,
Sabahın, həm bu günün, həm dünənindir bu Vətən.
Sənin öz dövlətin, öz millətin, öz cəddin var
Vətən uğrunda ölənlər ölümündən doğular.

Biz Vətən məcnunu, el aşiqi, sülh əsgəriyik
Biz Vətən naminə ölsək, dirilərdən diriyik.
Mənim öz ulduzumu bağrına basmış hilalım,
Dedi öndər: “Yönü bayraqdakı üç rəngdən alım”.

Sən bu gül bayrağın altında məramınca yaşa,
Qoyma düşmən nəfəsindən ona çirkab bulaşa.
Sənin öz bayrağının kölgəsi cənnətdi sənə,
Günəş hər gün doğur ancaq içimizdən Vətənə.

Bizim iqbalımızı yazdı qılıncın kəsəri,
Bizi biz etdi Dədəm Qorqud oğuznamələri.
Ey Azərbaycanımız, türkün oğuzlar Vətəni,
Ər oğullar, ər igidlər, kişi – qızlar Vətəni.

Sənin haqqındır azadlıq, sənin eşqindir iman,
Tapmar haqqa və insanlığa haqqdan doğulan.
Bəşərin dərdini öz dərdi bilib millətimiz.
Bizim öz niyyətimizdən doğub hürriyyətimiz.
Gecələr yatmadan əvvəl sor özündən ki:
“Bu gün Mən nə etdim məni yurddaş edən öz yurdum üçün?”

Açar sözləri: vətənpərvərlik haqqında şeirlər,vətənpərvərlik haqqında şeirlər,vətənpərvərlik haqqında şeir,vetenperverlik seirleri,vətənpərvərliyə aid şeirlər,vetenperverlik haqqinda seir,vətənpərvər şeirlər,vətən haqqında şeir,vətən haqqında şeirlər,vətənə aid şeirlər,veten haqqinda seir