1001Güzel Söz
27 Sentyab şeirlər
27 sentyabr – 44 Günlük Vətən Müharibəsində Zəfərə gedən yolun başlanğıc günüdür. Bəli, bu gün Qarabağa qayıdışa gedən o şərəfli günlərin ilk günüdür. 44 günlük Zəfər yolunda canının qurban vermiş Şəhidlər öz adların əbədi tarixə yazdılar.Qanlarlarıyla tarix yazanlar həm də milyonlarla ürəyə yol tapdılar, yaddaşlarda unudulmaz bir iz qoydular. Və onlar haqqında yeni zəfər nəğmələri bəstələnəcək, şeirlər yazılacaq, filmlər çəkiləcəkdir. Tarix yazanlar həmişə tarixdə qalacaqdır…
Sənə Zəfər Yaraşır şeiri
Müəllif: Nicat İsmayılov (“Xəzər Tv”nin redaktoru)
Vətən müharibəsində
Biz qələbə qazandıq.
Bu gün Anım Günüdür
Qəhrəmanları andıq.
Tarix yazdı igidlər,
Hamısı əzizimizdir.
44 günlük müharibə,
Şanlı tariximizdir!
Dəmir yumruq düşmənin,
Mənfur başını əzdi.
Düşmənlər Qarabağda
Daim qala bilməzdi.
İndi azad Qarabağ
Günbəgün abadlaşır.
Mənim qədim torpağım!
Sənə bu çox yaraşır.
Bizə Zəfər yaşatdı,
İgid oğullarımız.
Hər birini anırıq,
Minnətdarıq hamımız!
Yaşa, Vətən, çox yaşa,
Yaraşır Zəfər sənə
Şəhid şeiri (Müxtəsər)
Müəllif: Hüseynli Əkbər
Tanrı bütün dağların
Taleyini tən yazıb.
Ayaq izin Murovda,
Qar üstə “vətən” yazıb.
Yazıb itgin dedilər,
Gizlədi zaman səni.
Bircə günə bir ömür,
Gözlədi anan səni.
Mən səni tanıyıram,
Cənnətin güllərindən.
Mən səni tanıyıram
Kərbəla çöllərindən,
Tanıyıram, əbədi
Yadda qalan birisən.
Birdən-birə böyüyüb
Vətən olan birisən.
Mən səni tanıyıram,
Torpağın canındasan,
Atanın yuxusunda,
Tanrının yanındasan.
Şəhid Şeiri
Müəllif: Elzamin Təhməzova
Zəfərin bu taydadır,
Özün o tayda, şəhid.
Balası boyda ata,
Vətəni boyda şəhid.
Şəkillərə baxıram,
Təbəssümün ucalır.
Adam sənə baxanda
Baxışından güc alır.
İgidliyin çıxıbdır,
Şəkillərinə, şəhid,
Nümunəsən əbədi,
Bu millətin gələcək
Nəsillərinə, şəhid.
Sən döyüş meydanına
Öndə gedən komandir.
Sən 400 əsgərini
Xilas edən komandir.
Rahat uyu, şəhidin
Məqamı da cənnətdir,
Rahat uyu, balan da
Vətənə əmanətdir.
Əmanətdir adın da,
Dillərdə əzbər kimi.
Səninlə fəxr edirik
Hamı bir nəfər kimi.
Sən ordunun polkovnik –
Leytenant komandiri,
Sən kəşfiyyat şəhidi,
Kəşfiyyat komandiri.
Sən döyüş meydanında
Tufan qoparan oğul.
Şuşaya, Füzuliyə
Bizi aparan oğul.
Sağ ol, sənsən düşmənin
Yeddi postunu yenən.
Şəhid əsgərlərinə
Hamıdan salam denən.
Həsrət bitdi Qarabağ
Qarabağı işğaldan,
Azad etdi igidlər.
Heç zaman unutmarıq,
Tarix yazdı şəhidlər.
44 gündə düşmənə,
Qəhrəmanlar çəkdi dağ.
30 il ayrı qaldıq,
Həsrət bitdi, Qarabağ.
Keçdi qorxmaz oğullar,
Od-alovun içindən.
Danışacaq nəsillər,
Onların mərdliyindən.
Aylar, illər ötəcək,
Qürurla anacağıq.
Şəhidlər ölməzdilər,
Birgəyik sanacağıq.
Əziz Vətən, can Vətən,
İgidlərin var olsun.
Oğlun, qızın səninlə
Daim bəxtiyar olsun.
Şəhidim Şeiri
(Zabit Fərid Məmmədovun əziz xatirəsinə)
Sən ki ölməmisən, sağsan, şəhidim,
Uca, əzəmətli dağsan, şəhidim.
Vətən də, anan da qoy fəxr eyləsin,
Hər zaman sən üzü ağsan, şəhidim.
Cəbhəyə getməyə çox tələsirdin,
Qisas almaq üçün fürsət gəzirdin.
Quynundan çıxarıb üçrəng bayrağı,
Sancsaydın, bitərdi Şuşa həsrətin.
Nə olar, bir az da dözüb duraydın,
Düşmənin qəlbinə yara vuraydın.
Dostlarınla birgə çatıb arzuna,
Şuşada bayrağı sən qaldıraydın.
İndi Azərbaycana fəxrsən sən də,
Sonsuz fəxr hissi duyum mən də.
Hər şəhid balamdır, oğlumdur mənim,
Ruhları şad olsun azad Vətəndə.
İgid qazilər də qoy sağalsın,
Adları tarixdə əbədi qalsın.
Xatirən yaşayar daim, Şəhidim,
Sən candan keçdin ki, el zəfər çalsın.
Şəhid qardaşıma şeiri
Müəllif: Cavidan Hacıyev
Halallıq ver bizə, şəhid qardaşım.
Halallıq ver bizə haram dünyada.
Torpağa hopsa da qanla göz yaşı,
Bu dünya ac qalıb mənəviyyatdan.
.
Halallıq ver bizə, şəhid qardaşım.
Seçə bilməsək də halal, haramlar.
Bir dəfə ölürsüz siz, uzaqbaşı.
Hər bir gün ölürlər tənha analar.
.
Havalar bir azca soyuq keçəndə
Analar söyləyər «Balam necədir?».
Diləyər xoş yuxu hər bir gecədə,
Balası ölsə də. Nə qəribədir?.
.
Süfrələr açılıb, gəlibdir bayram.
Artıq bir boşqab da vardır masada.
Süfrədə oğlunun sevdiyi ənam.
Nə olsun, cəsədi tapılmasa da?
.
Dilərik, alasan Cənnət müjdəsin.
Bu olar anana təskinlik bir dəm.
Torpaqda sənin də çoxdur əziyyətin.
Torpağa haqqını halal elə sən.
Şəhid Xudayar Yusifzadəyə
Müəllif: Cavid Qurbanov
Duman gəldi, dağ dumanda əridi,
Yağı düşmən ətrafları bürüdü.
Ana yurdun bülbül səsli igidi,
Nəğmələrin Səndən qaldı yadigar,
Şəhid balam, şəhid oğlum, Xudayar!
Sən daşıydın , torpağıydın Vətənin,
Ağacıydın, budağıydın Vətənin,
Nəğməli bir qonağıydın Vətənin,
Sən gedəli o dağlara yağdı qar,
Şəhid balam, şəhid oğlum, Xudayar!
Unudarmı oba Səni, el Səni ?!
Unudarmı çəmən, çiçəkək, gül Səni?!
Unudarmı duman Səni, çən Səni ?!
Hər ürəkdə Sənin üçün xeymə var ,
Şəhid balam, şəhid oğlum, Xudayar!
Dastan deyib, dastan olan igidim,
Döyüşündə aslan olan igidim,
Şəhidliklə zirvə tutan igidim,
Ruhun cənnət, yerin olsun laləzar,
Şəhid balam, şəhid oğlum, Xudayar!
Salam, şəhid anası şeiri
Müəllif: Amir Mustafa
Salam, şəhid anası!
Mən də sənin bir balan.
Olmasam da qəhrəman
Şuşa, Kəlbəcər alan.
Sənin oğlun tapşırıb,
Səni mənə yol aldı.
Məhz onun sayəsində
Ordumuz zəfər çaldı.
Salam, şəhid atası,
Sən necə qürurlusan.
Dağ boyda oğlun gedib,
Yenə də dik durmusan.
Ağappaq saçlarından,
Nur saçılır, nur, ata.
Hər zaman qürurlu ol,
Həmişə dik dur, Ata!
Salam, şəhid bacısı,
Dağ gördün, dağ itirdin.
Üzü nurlu bir igid,
Arxa, dayaq itirdin.
İndi bütün igidlər,
Qardaşındir, ay bacı,
Sən şəhid bacısısan
Sənə yoxdur tay, bacı.
Salam, şəhid qardaşı,
Yaş tutmasın gözünü,
Hər an şəhid olmağa,
Hazır elə özünü.
Sənin qardaşın, sonra,
Mənim qardaşım gedər.
Sonra mən, sonra da sən
Sonra bütün igidlər.
Salam, şəhidin yarı,
Bilirəm darıxırsan,
Bir ümid, gələr deyə
Pəncərəyə baxırsan.
Bilirsən gəlməyəcək
Yol yoxdur daha geri
Şəhid olub igidin
Cənnətdir onun yeri.
Sən, ey şəhid övladı,
Boynunu bükmə qəti,
Çünki heç bükülmədi
Atanın şux qaməti.
Şəhiddir sənin atan
Ay ölkəmin çırağı,
Şəhidlər diri qalar,
Şəhidlər ölməz axı.
Şəhid Asiman Əliyevə
Müəllif: Elşad BARAT
Salam, zəfər qalası.
Vətən şəhid, can şəhid.
Özün asimandasan,
Adın Asiman, şəhid!
Səni yuxuda gördüm,
Səmalarda dolaşdıq.
Yuxuda tanış olduq,
Yuxuda doğmalaşdıq.
Yaşımız da eynidir,
Arada az zaman var,
Mənim də üç balam var,
Sənin də üç balan var.
Bircə fərqimiz budur:
Sən şəhidlik yolunda,
Müqəddəslik yolunda…
Mən həsrətin donunda,
Sən Tanrının yanında.
Bir də ki, sən ucaldın,
Günəşəcən, ayacan.
İgidliyin deyilir
Bakıdan Şuşayacan.
Sağ ol, qələbəmizin
Şuşa-qala şəhidi,
Sən vətən şəhidisən,
Anan bala şəhidi.
Şəhid Mehrab Niftəliyevə
Müəllif: Elşad BARAT
Elə indi oxudum
Döyüş yolunu sənin.
Şuşanın üzərində
Zəfər qolunu sənin.
Elə indi oxudum
Tarix üstə qanını.
Qəhrəmanlıq yolunu,
İgidlik dastanını.
Oxudum ki, vətənə
Qovuşmaq arzun olub.
Oxudum ki, Şuşada,
Vuruşmaq arzun olub.
Bütün varlığın ilə
Döyüşlərə girmisən.
Sonuncu nəfəsini
Təbəssümünə qatıb,
Şuşada dalğalanan
O bayrağa vermisən.
Beləcə də köçmüsən
Vətənin hər daşına.
Adın qanınla düşüb
Tarixin yaddaşına,
Əbədi işıq şəhid,
Odun mübarək olsun!
Yerin mübarək olsun!
Adın mübarək olsun!
Daha sənin adın da
İgidlik qalasıdır.
İndi sənin üç balan
Vətənin balasıdır.
Zəfər tariximizə
Yazılan kitab oldun,
Adın da Mehrab idi,
Özün də mehrab oldun.
Daha xatirələri
Şəkillər daşıyacaq.
Adın ürəyimizdə
Əbədi yaşayacaq.
Başını Uca Tut şeiri
Müəllif: Şirin BÜNYADOVA
Başını uca tut şəhid anası,
Vətənə mərd oğul bəxş eləmisən.
Sızlayır köksündə bala yarası,
Qəbrinə adını nəqş eləmisən.
Başını uca tut şəhid atası,
Elə şəstlə yeri, elə qürurlan.
Vətən övladıdır, Vətən balası
Torpağa verdiyin mərd, igid, cavan.
Vətən kimliyimiz, Vətən adımız,
Vətən qeyrətimiz, Vətən andımız.
Vətən torpağımız, ağız dadımız,
Vətənə qurbandır şirin canımız.
Başını uca tut şəhid xanımı,
Sən çəkən acını bütün xalq çəkir.
İndi bütün günlər onun anımı,
İndi bütün yollar tək ondan keçir.
Başını uca tut şəhid balası,
Qoy səni yaşatsın dəyanət, qürur.
Sən ata yurdunda qeyrət qalası,
Arxanda bir millət, bir dövlət durur.
Başını uca tut şəhid bacısı,
Qəlbinin dərdindən su içər gözün.
Səni rahat qoymaz qardaş acısı,
Adını yaşadar hər zaman sözün.
Şəhidlər gözlərdən axan yaşımız,
Şəhidlər ölməzlik rəmzidir bizə.
Şəhidlər tarixdə qan yaddaşımız,
Qanıyla yol cızıb hər birimizə.
… İlahi ədalət zəfər çalacaq,
Qarabağ bizimdir, bizim qalacaq.
ŞƏHİD HAQQI ŞEİRİ
(Mübarizlərin ruhu qarşısında borcluyuq…)
Hər bir gedən şəhidin haqqı var boynumuzda,
Onlara borclu olan bir can var qoynumuzda,
Gərəkdir, sırğa ola; qulaqda, eynmizdə,
Əgər biz unutsaq da, dövran bunu unutmaz…
Bu yara hey su verər, zaman onu qurutmaz…
Bu bizim şakərimiz, həp şikarı unutmaq,
Boş-boş təsəllilərlə ruhumuzu ovutmaq,
Cismimiz oyansa da, layla deyib uyutmaq,
Bir gün biz istəsək də, dövran bizi oyatmaz…
Biz yatmaq istədikdə, zaman bizi uyutmaz…
Bir əsgər kəmərinin toqqasıcan yoxuq biz,
İllərdi ki, gözləyir; neçə qışdı, neçə yaz,
Deyir: – “Gəl bu şəhidə bir quruca məzar qaz”,
Bu qədər bivec ata, yada ki, qardaş olmaz…
Vallah, atam-qardaşım bundan vacib iş olmaz…
Hər şeyi yükləmişik, Lazım bəyin belinə,
Zalım oğlu zalım da qüvvət verib dilinə,
Heç kimsə razı olmaz, bir quş səkə gülünə,
Bəs bu dağlarda yatan gül balalar kimindi?!
Ay – ulduzlu toqqalar, qumqumalar kimindi?!
Dəstəklərə yazılı, neçə-neçə adımız,
Qundaqlara qazılı, sezilməyən ay-ulduz,
Nişan durub, gözləyir; birdən düşər yolumuz,
Gəlin, o nişanların gözün yolda qoymayaq…
Bu işi, bu gün görək, sabaha saxlamayaq…
Bu işin bir yolu var, göstəribdi Mübariz!
Torpaq bizim Vətənsə, düşməlidi izimiz.
Bəsdir bəhanə etdik, bağlanıbdı yol-iriz.
Örnəkdən, ibrət alıb, cümləmiz coşmalıyıq!!!
Tikanlı məftilləri bu gün biz aşmalıyıq!!!
Dəli bilirlər bizi, doğruldaq adımızı,
Dost özün göstərəcək, tanıyaq yadımızı,
İllərdir su vermişik, püskürək odumuzu,
Belə yaşamaq olmaz, bilməliyik hamımız!!!
Mübariz gedən yolu, getməliyik hamımız!!!
ALLAH ŞƏHİDLƏRİMİZƏ RƏHMƏT ELƏSİN!
Bənzər Yazılar:
- Sülhə Aid Şeirlər oxubil.info
- Vətənə aid şeirlər
- Heydər Əliyev – Tarixi Sözləri və Sitatları
- Vətənə aid uşaq şeirləri – oxubil.info
Açar sözlər: 27 sentyabr anım günü şeirlər,27 sentyabr şeirlərİ, 27 sentyabr aid seirler, 27 sentyabr aid seirler,27 sentyabr anım günü şeir,Şəhidlərə aid şeirlər, Şəhidlərə aid şeirlər,27 sentyabr anım gününə aid şeirlər,anım gününə aid şeirlər, 27 sentyabr aid şeirlər
